Uppat a pulo ket walo a manok a nailugan iti L300 utility vehicle ti nasalamaan iti national highway idiay Barangay Tapao, Sinait, Ilocos Sur.
Nabigbig ti drayber ti lugan a ni Ariel Fronda Narvacan, agtawen iti uppat a pulo ket pito, taga-San Antonio, Paco Manila.
Dagiti helperna ket da Noel Almario Dialino, agtawen iti tallopulo, Albert Aquino Sia, agtawen iti tallopulo ket lima, ken ni Querigma Reyes Mosquito, agtawen iti tallopulo, agpapada a taga-Poblacion, San Isidro, Nueva Ecija.
Inreport ni Melchor Sarte Tangonan, empleado ti Ilocos Sur Provincial Animal Quarantine idiay Tapao, Sinait iti Sinait Municipal Police Station idin ta nasitarda ti agpapa-abagatan nga L300 utility vehicle a naglaon kadagiti nasao a manok nga aggatad iti P21,000.
Maipatulod koma daytoy idiay Batac, Ilocos Norte ngem awan ti maiparang a papeles dagiti naglabsing ta awan ti shipping permit, saan nga accredited ti luganda ken saanda a nagpaidalan iti inspeksyon.
Naipaiman iti Provincial Animal Quarantine dagiti naglabsing agraman ti lugan tapno maidalan iti husto a proseso.
