Imimbestigaran ti Land Transportation Office (LTO) iti uppat a pulo a district office-da gapu iti panagproseso ti Transfer of Ownership kadagiti lugan a nakumpiskar kadagiti naisayangkat a police operation.
Pagpalpalawagen ti LTO Chief Assistant Secretary Atty. Vigor Mendoza II dagiti district head maipanggep iti nakumpirmaran nga intelligence reports iti illegal ownership transfer dagiti motor vehicle nga immunan nga inladawan ti Philippine National Police a technical carnapping.
Naduktalan iti maysa a coordinating meeting nga adda sumagmamano nga LTO district offices iti karaman ti Unauthorized Processing of Cancellation of Transfer of Ownership ken duplication of Certificates of Registration.
Iti salinong ti modus, dagiti narekobre a lugan ket illegal a maiyakar iti baro nga akin-kukua babaen ti baro a duplicate Certificates of Registration ken dadduma pay a documentation tapno mapagbalin a valid ti transfer of ownership.
Insigida nga imbilin ni Department of Transportation Secretary Vince Dizon a makasoan dagiti agar-aramid iti nasao a modus.
Mangiruar pay iti LTO iti show cause order kadagiti karaman nga akin-kukua tapno pagpalawagen.
