Inwaragawag ti Department of Energy (DOE) a naisublin ti koriente kadagiti uppat a milion manipud iti 4.8 million a pagtaengan ken negosio nga inapektaran ti Bagyo Tino ken Uwan.
Segun ken ni DOE Secretary Sharon Garin, agtultuloy ti 24/7 power restoration efforts-da kas tignay ti ahensia manipud iti pammilin ni Presidente Ferdinand R. Marcos Jr.
Impannakkel pay ti DOE ti balligi a panangurnos kadagiti critical energy infrastructure iti nadumaduma a rehion, pakairamanan dagiti planta ti koriente kas ti Sabangan Hydroelectric, GIFTC2 Biomass, ken Morong Solar.
Idiay Catanduanes, naisubli metten dagiti transmission line kas iti Virac-Codon ken Virac-San Miguel, idinto adu metten a pribado a kompania ti koriente iti Luzon ken Visayas ti nalpasen ti restoration, pakairamanan ti La Union Electric, Subic Enerzone, ken Mactan Electric.
Target ita ti ahensia a maisubli ti koriente kadagiti nabatbati a 800,000 a naapektaran a pagtaengan ken negosio kadagiti sumaganad nga aldaw. Augie Arellano
