Uppat iti nadunor iti aksidente a nakairamanan dagiti tallo a motorsiklo iti national highway idiay Barangay Olo-olo Norte, Santiago, Ilocos Sur idi rabii, March 20, 2026.
Ti nagmaneho iti Yamaha Mio i125 motorcycle ket lalaki nga agtawen iti duapulo ket dua, baro, awanan iti driver’s license, kaduana ti lalaki nga agtawen iti sangapulo ket pito, agpada a nakaaramat iti protective helmet nga agnaed idiay Barangay Olo-olo Norte, Santiago.
Ti nagmaneho ti Honda TMX 125 motorcycle ket lalaki nga agtawen iti duapulo ket siam, nagaramat iti protective helmet, awanan iti driver’s license nga agnaed idiay Barangay Pidpid, Sta. Cruz.
Minaneho met ti red Yamaha NMax motorcycle ti lalaki nga agtawen iti duapulo ket walo, baro addaan ti professional driver’s license, nagaramat iti protective helmet nga agnaed idiay Barangay Baliw Daya, Sta. Maria.
Sakbay iti insidente ket agpapabagatan a direksyon ti Mio ken TMX idin nadanonda iti nasao a lugar ket pinadasda a liniklikan ti nakawara a bulong iti nipa palm iti main lane ngem naawananda iti kontrol idinto a ti NMax nga aggapu iti bangir a linya ket nadungoarna dagiti dua a nakamotorsiklo ta naawanan met laeng iti kontrol iti manibelana.
Gapu dayta ket amin a driver ket nagsagaba iti head ken body injuries idinto a ti backrider iti V1 ket nagsagaba iti fracture iti akin-kannigid nga abagana ket naipanda amin iti Candon General Hospital, Candon City para iti pannakatamingda.
