Agpapada a nadunor dagiti uppat nga indibidual iti aksidente a nakairamanan dagiti dua a motorsiklo iti provincial road idiay Barangay Darapidap, Candon City, Ilocos Sur idi rabii, March 10, 2026.
Ti nagmaneho iti Black Yamaha Sniper ket lalaki nga agtawen iti duapulo, baro, estudyante nga agnaed idiay Barangay Poblacion Sur, Gregorio Del Pilar nga addaan iti driver’s license; backride-na ti maysa a babai nga agtawen iti duapulo ket dua, awanan iti trabaho nga agnaed idiay Matue, Gregorio del Pilar.
Ti nagmaneho met iti Black/Blue Yamaha Sniper ket lalaki, agtawen iti sangapulo ket siam, estudyante, awanan iti driver’s license nga agnaed idiay Barangay Pangotan, Sugpon ken backride na ti lalaki nga agtawen iti sangapulo ket siam, estudyante nga agnaed idiay Barangay Banga, Sugpon.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, agpada nga agturong iti daya a direksyon dagiti dua a lugan a ti akin-sango ket ti nangisit nga sniper ket nagsikko babaen ti panagsignalna tapno sumrek idiay Barangay Talogtog.
Segun ken ni Antalan, pinadas ti akin-likod a motorsiklo iti ag-overtake ngem saanna a napansin ti akin-sango a lugan a gappuanan iti pannakatukbobna.
Gapu dayta ket agpapada a nadunor dagiti nagmaneho ken backride-da isu a naipanda amin iti Ilocos Sur Medical Center para iti pannakatamingda.
Balakad ni Antalan kadagiti nagannak a saan a palubosan dagiti annak nga estudyante nga agmaneho nga awan iti naan-anay a dokumentoda ken pinalagipanna dagiti agmanmaneho iti kanayon a panagannad tapno maliklikan iti aksidente ket singasingna a nasaysayaat ita nga agaramat iti bisikleta wenno magmagna laengen a mapan iti pagadalan no saan unay nga adayo tapno makatiped pay kagiddan iti ngimmina a presyo iti produkto petrolyo.
