Nakakustodiyan kadagiti pannakabagi ti linteg dagiti uppat a lallaki a nangisayangkat ti robbery hold-up iti maysa a lending institution idiay Barangay Calaoan, Candon City, Ilocos Sur kalpasan a nakemmegda idiay Sudipen, La Union idi kalman, June 12, 2025.
Dagiti suspek ket naammoan nga agpapada a taga-La Union ngem saan nga agkaka-barangayan, ken ti maysa kadakuada ket datin a naserbian iti dua a warrant of arrest gapu iti kasona a homicide ken attempted robbery.
Iti pannaki-uman ti Bombo Radyo Vigan ken ni PLt. Jovelyn Antalan manipod Public Information Office iti Candon City Police Station, nagturong dagiti suspek iti lending institution idiay Calaoan, Candon City ket bayat a nakatakder ti maysa nga empleado iti terrace ket maysa kadagiti suspek iti nangtutok kenkuana ti paltog ket nasaludsod nu sadino iti ayan dagiti kakaduana nga insigida met nga intudona.
Segun ken ni Antalan, insigida a napan dagiti suspek iti ayan dagiti empleado ket tinurongda iti akin iggem ti kaha sada innala ti black box a naglaon iti kuarta ken dua a cellphone nga aggatad iti P10,000 ken P5,000.
Kalpasan iti panaghold up dagiti suspek ket naglibasda babaen iti nagluganda iti van a nagturong iti bagatan a direksyon.
Apaman a nakapanaw dagiti suspek ket naireport iti pasamak kadagiti polis isu a nagrespondeda ken naalerto dagiti kabangibang nga ili iti Ilocos Sur pakairamanan iti kabangibang a probinsia para iti dragnet operation a gappuanan iti pannakakemmeg dagiti suspek.
Naammoan a ti nasao a lending institution ket isu payen ti agserserbi a pagdagdagusan dagiti empleado nga agpapada met laeng a taga-La Union.
Saan nga ikkaten dagiti otoridad iti posibilidad nga adda napasamak nga inside job ta agpapada a taga-La Union dagiti empleado ken suspek, nairana a na-disconnect ti WIFI connection iti CCTV footage ken nu kasano nga ammo dagiti suspek iti kaadda ti trabaho dagiti empleado iti baet a holiday idi kalman.
Gapu dayta ket agtultuloy latta iti panagsukisok dagiti pannakabagi ti linteg iti pasamak nu man pay maibilang a solved case ta nakemmeg dagiti suspek ngem saan a maikkat kadakuada iti posible nga adda pay sabali a kakadua dagitoy gapu iti agduduma nga anggulo.
Kaso a Robbery Hold-up iti sangwen dagiti suspek ken posible a maipila pay ti panaglabsing iti Republic Act 10591 wenno Comprehensive Firearms and Ammunition Regulation Act ken illegal possession of a deadly weapon ta maysa a kutsilyo iti nasarakan manipod kadagiti suspek.
VIDEO – PLT. JOVELYN ANTALAN
