Mangipila ti National Bureau of Investigation ti nayon a tallopulo a kaso iti Department of Justice mainaig iti maipagarup a maanomalya a flood control projects iti agduduma a paset ti pagilian.
Segun ken ni NBI Director Atty. Melvin Matibag, umabot iti 27 a kaso ti impila da, pakairamanan ti reklamo kontra kada Senador Jinggoy Estrada, dati a senador Bong Revilla, dati a Department of Public Works and Highways (DPWH) Secretary Manuel Bonoan, ken sumagmamano a district engineer ti DPWH.
Pinasingkedan ni Matibag a saan laeng a naka-sentro iti imbestigasion da idiay Taguig City a balwarte ni Senate Minority Leader Alan Peter Cayetano.
Impaganetget na a nalawlawa dagiti kaso nga impila ti NBI ken agtultuloy ti panang-pokus da iti dadduma pay a flood control project a mapapati nga adda pakainaiganna iti korapsion.
Gagem ti NBI a madusa ti amin a karaman iti nalawa a kontrobersiya.
