VIGAN CITY – Dua gasut tallo pulo ket dua a mannalon ditoy Vigan, Caoayan ken San Vicente iti nawarasan iti cash card idi naminsan nga aldaw a kas paset ti SURE Aid Assistance ti Department of Agriculture.
Ti nasao a programa ket loan assistance ti DA para kadagiti mannalon kadagiti naduma-duma a lugar a para laeng kadagiti agkasapulan a mannalon.
Inlawlawag ni Ceasar Ulpiendo ti Land Bank of the Philippines a ti card a naited kadagiti mannalon kadagiti nasao a lugar ken maited to met kadagiti sabali pay a benepisyaryo ket naglaon ti sangapulo ket lima ribo a pisos a loan assistance ngem awan iti interes na ken mabalin a bayadan dagiti immutang a mannalon iti uneg ti walo a tawen.
Mangrugi iti panagbayad dagiti immutang inton November 8, 2020 ket agtinnag da iti kada innem a bulan agingga a mabayadan da amin ti nasao a gatad inton November 5, 2027.
Nadakamat na a nu kaspangarigan saan a makabayad ti immutang a mannalon ket adda dagiti addang nga iwayat ti bangko tapnu masingir da ida ngem namnamaen ni Ulpiendo a makabayad amin dagiti pautangan da a mannalon agsipud ta saan met a nadagsen ti sangaribo a pisos iti kada innem a bulan a bayad da.
