Indanon ni Senator Erwin Tulfo ti tulong kadagiti duapulo ket dua a mangngalap a na-repatriate manipod idiay Malaysia kalpasan iti makabulan a pannakaibalud gapu iti mapapati a saan nga otorisado a panagserrek iti teritoryo iti nasao a pagilian.
Impaganetget ni Tulfo a chairman iti Senate Committee on Foreign Affairs ti kinapateg ti panagbangon manen ken makasubli iti pagsapulan dagiti mangngalap a napaut a naibalud iti sabali a pagilian.
Dagiti mangngalap a nakasubli kadagiti pagtaenganda idiay Rizal, Palawan ket nakaawat manipod iti senador kadagiti alikamen a pagkalap kas iti handheld fish finders, nets ken nylon.
Segun ken ni Tulfo, dagiti naited nga alikamen ket mangsigurado a makasubli dagiti mangngalap iti pagsapulanda tapno maitakder iti pamiliada.
Kabayatanna, tapno saanen a maulit iti insidente ti “unauthorized entry” iti teritoryo iti sabali a pagilian ket pinalagipan ti senador ti amin a mangngalap iti lugar nga agbalin a naalibtak iti international maritime boundaries tapno saan nga aglabes ken aglabsing iti linteg iti sabali a pagilian.
