Naiyakar ti 200 a persons deprived of liberty (PDL) iti New Bilibid Prison idiay Muntinlupa City agturong iti Sablayan Prison and Penal Farm idiay Occidental Mindoro.
Segun ti Bureau of Corrections (BuCor), nakadanon iti Sablayan Prison dagiti PDL idi June 21.
Dayta ket paset iti addang ti gobierno a makissayan ti panagseseksek kadagiti pagbaludan ken maisarra iti NBP inton 2028.
Kinuna ni BuCor Director General Gregorio Pio Catapang Jr., gagem ti panagakar a maikkan iti nasayaat nga aglawlaw dagiti PDL ken gundaway a dumalan dagiti programa para ti pagbiagan ken panagsanay iti agrikultura para iti rehabilitation-da.
Paset pay dayta iti nalawa a modernisasion ken decentralization iti correctional system iti pagilian tapno matignayan iti nabayagen a parikot a panagseseksek, daan nga imprastruktura ken seguridad iti NBP.
