Imbutaktak ni Presidente Ferdinand Marcis Jr dagiti sumagmano a naduktalanna iti imbestigasyon mainaig kadagiti kontrobersyal a flood control projects ti gobierno.
Segun ken ni Marcos, 20 percent laeng manipud iti pakabuklan a P545.64 bilion a gatad dagiti flood control project ket napan laeng kadagiti sangapulo ket lima a contractor, ken lima kadagitoy ket adda proyektoda iti arigna amin a rehion iti pagilian.
Naduktalan pay nga adda 6,021 a proyekto nga awan ti husto nga specifications-na, ken adu dagiti agpapada ti gatadna nga inladawan ti presidente nga imposible.
Dagiti rehion nga adda dakkel a gastosna ket ti National Capital Region a 1,058 a proyekto nga aggatad iti P52.57-B ken ti Region 3 ken Region 5 nga 866 a proyekto nga aggatad iti P49.61-B.
Binabalaw pay ti presidente ti saan a mayannatup a distribusyon dagiti proyekto isu a kiddawna ti naing-inget a pannakaadal kadagiti finding tapno maammuan no asino ti nasken a madusa.
