Sinerrek dagiti dua a mapapati a menor de edad iti Paing Elementary School idiay ili ti Bantay, Ilocos Sur.
Iti pannaki-uman ti Bombo Radyo Vigan ken ni Delfin Llagas, Principal IV iti Paing Elementary School, maysa kadagiti mangisursuro iti napan iti pagadalan ket nakitana iti kandado iti kantina a nadadael a kasla namartilyo iti langana isu nga impakaammona iti naduktalanna.
Segun ken ni Llagas, iti panangreview-da dagiti CCTV footage ket naduktalanda nga idi parbangon idi kalman (September 16) ket adda dua a lalaki a simrek iti pagadalan ken napan iti kantina a nangdadael iti kandado sada simrek.
Saan a mabigbig dagiti lallaki ta nakaabungotda ngem patien dagiti mangisursuro a menor de edad dagitoy ken mapapati nga ammodan iti aglawlaw iti pagadalan ta kasla pamiliar kadagiti nakaikabil a CCTV ta dua kadagitoy iti tiniritirda tapno saanda a makita.
Mapapati a ti gagara dagiti lallaki ket dagiti taraon ken mainom iti kantina ta isu laeng iti adda iti uneg ket awan pulos iti aniaman a kuarta.
Kalpasan iti nasao a pasamak ket adda nangitawag ken ni Llagas nga adda nagtakaw iti motorcycle parts a kasla grupo dagiti agtutubo iti siudad ti Vigan ket mayar-arig kadagiti nagtakaw met laeng iti pagadalanda isu a manarimaan iti panag-verify-da.
