Nakemmeg dagiti dua a lalaki iti naisayangkat nga Anti-Illegal Gambling operation idiay Barangay San Nicolas, Candon City, Ilocos Sur idi rabii, June 20, 2026.
Nakaawat dagiti kameng ti Candon City Police Station ti impormasyon maipanggep ti mapapati nga illegal a panagsusugal iti nasao a lugar ket insigida a nagtignay dagiti otoridad tapno i-verify ket nakumpirmaranda iti nasao nga aktibidad.
Naaktoan dagiti suspek nga agayay-ayam iti “Pusoy Dos” ket naala kadakuada ti kuarta nga aggatad iti P8,181 a mapapati a naaramat kas pusta iti nasao nga ilegal a sugal.
Dua iti nakemmeg dagiti otoridad ngem tallo iti nakalibas bayat iti operasyon.
Dagiti nakemmeg a suspek ket naipan iti Ilocos Sur Medical Center (ISMC) para iti medical ken physical examination sakbay a naipan iti Candon City Police Station tapno dumalan ti husto a proseso ken pannakaipila ti kaso a panaglabsing ti Presidential Decree No. 1602.
