VIGAN CITY – Dua ribo a Canadian dollars iti binulan nga ited iti gobyerno ti Canada kadagiti kalugaran da a naapektaran iti panagraira ti coronavirus disease 2019 nangruna dagiti awan iti trabaho na ta nagsarra dagiti sumsumrekan da a business establishments ken dadduma pay nga opisina.
Dayta iti pinasingkedan ni Eugene Derro a taga- Silag, Sta. Maria ngem 37 a tawenen nga adda idiay Ontario, Canada ken agdama nga agtrabtrabaho kas food service manager.
Nu adda man iti tulong ti gobyerno kadagiti napukawan iti pagsapulan gapu ti COVID- 19, adda met iti muwelta kadagiti aglabsing kadagiti naiyetnag tapnu maparmek iti nasao a sakit.
Segun ken ni Derro, dagiti aglabsing kadagiti pagannurutan kontra COVID- 19 ket agmuwelta ti 750 Canadian dollars.
Kabayatanna, idiay Tainan, Taiwan, inaldaw latta iti trabaho dagiti factory workers a kas ken ni Megan Quillopras a taga- Callaguip, Caoayan ngem tallo a tawenen nga agtrabtrabaho iti nasao a pagilian.
Segun ken ni Quillopras, nainget iti panangsurot da kadagiti naiyetnag a pagannurutan tapnu maliklikan iti panagraira iti nasao a sakit a kas kadagiti sabali met laeng a pagilian.
