Indiaya ti Embahada iti Republic of South Korea ti sangapulo ket walo nga slots para kadagiti Pilipino nga aplikante iti salinong ti 2025 Global Korea Scholarship program a gagem a maikkan ti gundaway dagiti gangannaet nga estudyante a makaadal kadagiti unibersidad idiay Korea.
Manipod February 5 agingga March 1 ket umawat ti Korean Embassy kadagiti aplikasyon para ti graduate degree programs iti salinong ti embassy track.
Sakup ti scholarship ti makatawen a Korean language training, dua a tawen para ti Master’s degree tallo a tawen para ti Doctoral program wenno innem a bulan agingga makatawen para ti research studies.
Karaman kadagiti benepisyo iti programa ti panagbayad ti tuition fee, Korean language training fee, round-trip airfare, ken binulan nga allowance.
Dagiti masapul nga ipasa dagiti aplikante ket ti orihinal a dokumento, pakairamanan ti sealed recommendation letter ken official certificate iti naleppas a bachelor’s degree, pati ti tallo a photocopied sets.
