Nakemmeg dagiti sangapulo ket pito nga indibidual ken maidarumda kalpasan ti mapapati a panagbato ken panangpuorda iti trailer truck bayat ti protesta kontra korapsyon idiay Mendiola, Manila idi kalman, Setyembre 21, 2025.
Adda iti kustodia ti Manila Police District (MPD) dagiti nakemmeg a rallyist.
Impaganetget ti Philippine National Police (PNP) ti panagraem iti karbengan nga iyebkas ti kapanunotan dagiti umili, ngem kiniddawna ti kinatalna ken panangliklik iti kinaranggas.
Impasigurado dagiti pannakabagi ti linteg, nangruna ti PNP, nga agtalinaed nga ipatungpalda iti maximum tolerance, ngem agtignayda kontra iti asinoman a mangdangran wenno mangdadael kadagiti sanikua.
Napasamak dagiti protesta iti Rizal Park (Luneta), Mendiola, ken EDSA Shrine, kagiddan ti anibersario ti pannakaideklarar ti Martial Law idi panawen ni dati a Presidente Ferdinand E. Marcos, Sr.
Tinabunoan ti nasao a protesta dagiti ordinario nga umili, ken sumagmamano a showbiz personalities kas panawagan a mangdusa kadagiti korap nga opisial ti gobierno, nangruna no maipanggep iti korapsion kadagiti flood control project. – Augie Arellano
