Nakawiden dagiti sangapulo ket lima a marino a Pilipino a naglugan iti Qatari tanker nga Al Rekayyat a na-damage kalpasan a natamaan iti maysa a projectile iti Strait of Hormuz kas pinasingkedan ti Overseas Workers Welfare Administration (OWWA).
Segun ti OWWA, pinasangbayan ti ahensia kadua ti Department of Migrant Workers (DMW) dagiti marino tapno masigurado iti naurnos a proseso iti panagsangpetda ken maited iti kasapulan a tulong.
Sakbay dayta ket kinuna ti Department of Foreign Affairs (DFA) nga insigida a nagipatulod ti Philippine Embassy-Migrant Workers Office idiay Muscat iti maysa a team tapno makikammayet iti panangidaulo ti barko ken kadagiti marino a Pilipino ken masigurado a natalged dagitoy ken awan iti nadunor.
Siguradoen dagiti opisyal a naikkan dagiti marino iti taraon, medical check-up ken access iti komunikasyon kadagiti pamiliada iti Pilipinas.
