Pinalawa ti Kamara iti sangapulo ket tallo a bilang ti komite a mangpokus iti maymaysa a legislative response tapno risuten ti krisis ti presio ti langis.
Segun ken ni House Speaker Faustino Bojie Dy III, gagem ti joint hearings a mangrugi inton Abril 8 a makabukel ti konkreto a solusion iti pannakibinulig iti executive branch, imbes a pabasolen ti tunggal maysa.
Karaman iti sangapulo ket tallo a komite ti Energy, Agriculture, Transportation, Labor, Trade and Industry, Appropriations, ken dadduma pay.
Pinasingkedan met ni Marikina Rep. Miro Quimbo a tutukan ti grupo ti dagus a tulong kadagiti apektado a sektor kas ti transportasion, kasta pay ti atidddog a plano tapno mapapigsa ti ekonomiya iti daytoy a krisis.
Segun ken ni Quimbo, nupay saan a kontrolado ti epekto ti krisis, responsibilidad ti gobierno nga agsagana ken mangidatag ti solusion tapno marisut ti epekto kadagiti umili.
