Inyetnag ti Philippine National Police Anti-Cybercrime Group (PNP-ACG) ti kampaniada kontra social media accounts a mangpasarra iti online sale dagiti firecracker.
Iti listaan manipod ACG ket 115 social media pages iti naikkat gapu iti panagilakoda ti firecrackers iti online, limapulo ket siam iti manipod Facebook, sarunwen iti limapulo ket uppat iti X wenno dati a twitter ken uray idiay spotify.
Siam a pulo ket tallo nga online accounts iti aktibo pay laeng, pitopulo ket maysa idiay Facebook, duapulo iti X, maysa iti spotify ken maysa website.
Segun ken ni ACG Director Brig. Gen. Bernard Yang, nu makitada nga aglablabsing iti social media account ket isarrada.
Impaganetget ni Yang nga ipatpatungpalda iti cyber patrolling kontra panagilako iti firecracker ta uray pay legal dagiti nasao a paputok ken pyrotechnic devices ket nainget a maiparit dagita a mailako iti online.
Manipod pay idi November 20 ket nakumpiskar iti ACG iti agduduma a paputok a kas iti atomic bomb, Judas belt, whistle bomb, kabase, Goodbye Philippines ken Piccolo nga aggatad iti P76,400.
