Maysa pay a suspek iti pannakapapatay ti agtawen-iti-pitopulo ket tallo nga American national marine biologist a ni Kent Carpenter idiay Negros Oriental ti iggemen dagiti pannakabagai ti linteg.
Segun ken ni PNP Public Information Office Chief PCol. Allen Rae Co, simmuko ti maysa pay a suspek idi Biernes a ti akemna ket maysa met laeng a lookout.
Inlawlawag met ni Co a lima aminen dagiti suspek iti krimen ken saan nga uppat nga immuna a nadakamat.
Maysa pay a suspek ti sapsapulen dagiti pannakabagi ti linteg, nga isu ni alyas Eden, mapapati nga akin-iggem iti kuarta, boga, ken dadduma pay a natakaw dagiti suspek iti panagserrekda iti pagtaengan ti biktima.
Agtaltalinaed met a robbery ti motibo ti pannakapapatay ti biktima ken awan ti pakainaiganna iti trabaho.
