VIGAN CITY- Natay ni Dr. Andres Paleleng, taga- Bugias, Benguet gapu iti pannakalmes na iti 3j’s Swimming Pool idiay Cumillas North, Cervantes.
Maibasar iti report, mapapati a nabartek ti biktima nga agdigdigos iti swimming pool idi inbati dagiti uppat a kakadwa na ta napan da nangisagana ti taraon idi saan da a napupuutan a nalmes ti biktima.
Naitaray idiay Bessang Pass Memorial Hospital ti biktima ngem naideklara a dead on arrival.
Ti sabali a bangir, nakalasat met iti posible a pannakalmes na kuma da Joel Fajardo, agtawen ti innem a pulo ket lima, naasawaan, retirado nga empleyado ti bangko ken ni Armando Lara Ilias, agtawen ti uppat a pulo ket lima ken taga Imus,Cavite iti panadigos da idiay Dili Beach, Barangay Dili,Sta. Cruz ket naipan da idiay Ilocos Sur District Hospital ,Sta Lucia para iti pannakataming da.
