Inawat ti Armed Forces of the Philippines (AFP) ti P40 billion a nakalatang a pondo para ti proposed 2026 national budget iti revised modernization program.
Segun ken ni AFP Spokesperson Col. Francel Margareth Padilla, ti nasao a pondo ket saan laeng a basta numero iti papel nu diketdi pammaneknek ti determinasyon iti pagilian nga isalakan ti soberanya iti baet ti kumarkaru a tensyon kangrunaan idiay West Philippine Sea.
Kinuna ni Padilla a dakkel a tulong ti nasao a pondo tapno mapadaras ti pannakaipatungpal ti Comprehensive Archipelagic Defense Concept a mangpapigsa iti kabaelan ti AFP iti kadagaan, baybay, tangatang ken cyberspace.
Siguradoen ti AFP a tunggal piso manipod iti pondo ket gastoenda nga addaan ti transparency ken nalawag ti gagem tapno mapagtalinaed a nakasagana iti puersa iti panagbantay iti kabaybayan, salakniban ti teritoryo ken mapagtalinaed ti kappia ken kinatibker.
Umabot iti P430.87 billion ti pondo para iti defense sector iti 2026 national budget a 13.72% a nangatngato ngem iti P378.89 billion a nailatang iti 2025, pakairamanan ti P40 billion a nakailatang para ti AFP modernization program.
