Nagpalagip ti Philippine National Police kadagiti kamengda a pagtalinaedenda ti disiplina, propesyonalismo, ken husto a galad kalpasan ti pasamak idiay Sibulan, Negros Oriental a nakatayan ti maysa a sibilian ken tallo a pulis, pakairamanan ti mangidaulo ti kapulisan.
Segun ken ni Acting PNP chief Lt. Gen. Jose Melencio Nartatez Jr., adda zero tolerance ti PNP iti ania man nga immoral, ilegal, wenno saan nga etikal a galad a mangdadael iti talek ti publiko.
Kinondena ni Nartatez ti damag a ti suspek a ni Police Staff Sergeant Bonifacio Saycon Jr. ket adda iti maysa a resto bar sakbay ti pammaltog.
Binilinna dagiti opisial ti PNP nga ingetanda ti panagbantay ken dagus nga agtignay kontra iti madi a galad, ta ti panagikawes iti uniporme ket maysa a prebilehio nga adda katukadna a responsibilidad.
