Mabalin a karaman ni dati nga Ako Bicol Partylist Rep. Zaldy Co kadagiti sumango iti kaso iti Sandiganbayan gapu iti flood control anomaly kas pinasingkedan ni Ombudsman Jesus Crispin Remulla.
Iti deliberasion ti Senate Committee on Finance para iti gakat a P6.39 billion budget ti Office of the Ombudsman para iti fiscal year 2026, kinuna ni Remulla a target ti opisinana ti mangipila iti kaso kontra kadagiti sumagmamano nga opisial a mairamraan iti maanomalya a flood control projects iti baet ti anti-graft court iti uneg ti tallopulo nga aldaw.
Innayon ni Remulla a saan pay nga ammo no mano ti kaso a maipila idiay Sandiganbayan ta umab-abot iti walo ti kaso mainaig iti flood control ti nakapempen ken agdama a dumaldalan iti preliminary investigation.
Immunan a pinasingkedan ni Sandiganbayan Presiding Justice Geraldine Econg a ti Sandiganbayan ket agar-aramid kadagiti baro a patakaran tapno mapaalisto ti pannakaipila dagiti kaso a criminal ken panangdalus kadagiti docket dagiti daan a kaso tapno masaganaan ti panagipila iti Ombudsman ti impormasion kontra kadagiti opisial ken personalidad a karaman iti nasao nga anomalya.
