Pinasingkedan ti Young Guns iti Kamara a rumbeng a maidalan ti propesyunal a pannakaadal ni Vice President Sara Duterte kalpasan dagiti sinaritana iti press conference idi Biernes, October 18.
Makapadanag para kada 1st District La Union Rep. Paolo Ortega ken 1st District Zambales Rep. Jay Khonghun dagiti sinarita ni Vice President Duterte ken saan a kaawat-awat kangrunaan para iti maysa a nangato nga opisyal iti pagilian.
Segun ken ni Rep. Ortega, allukoyenda ti Office of the Vice President nga ikonsiderar iti panagkiddaw ti professional help ni Vice President Duterte ta makapadanag iti impakitana ken posible a makaapektar iti panangidaulona iti pagilian.
Kinuna met ni Rep. Khonghun a masapul a dumalan ti psychological assessment ti bise president tapno masigurado nu kabaelanna pay laeng iti agserbi iti pagilian ta makapaalarma dagiti sinaona.
Maipalagip nga imbaga ni Duterte a binallaaganna ni Senador Imee Marcos a kabsat ni President Ferdinand Marcos Jr. a nu mapasamak ti political attacks manipod administrasyon ket kalienna ti bangkay ni daydi President Ferdinand Marcos Sr. ket iballengna idiay West Philippine Sea.
