Nagpanawagan ni Parañaque 2nd District Rep. Brian Yamsuan a ma-regulate ti inspeksion ken mapagtalinaed dagiti infrastructure project ti gobierno tapno masigurado nga agtalinaed a natalged ken nangato ti kalidadda.
Iti House Bill 9780, insingasing ni Rep. Yamsuan a mangisayangkat ti Department of Public Works and Highways (DPWH) iti inspeksion tunggal 5 agingga iti 10 a tawen kalpasan ti pannakaileppas ti maysa a proyekto.
Segun ken ni Yamsuan, napateg ti regular a physical inspection gapu ta mabalin a maapektaran ti kinaandur dagiti proyekto gapu iti nakaro a paniempo, overloading ken dadduma pay a banag.
Kalikagumanna ti makinkukua wenno legal nga agus-usar iti lugar a palubosanna ti gobierno a mangaramid iti inspeksion, pannakamantener, pannakatarimaan wenno rehabilitasion.
Kinuna ni Yamsuan a panggep ti nasao a singasing a salakniban ti binilion a pisos ti pondo ti publiko ken masigurado a maganar dagiti proyekto iti napapaot a tiempo.
