Nangipila ti gakat ni Parañaque 2nd District Rep. Brian Raymund Yamsuan a gagemna nga obligaren dagiti lokal a gobierno (LGUs) nga agisayangkat ti konsultasion ti dua a gundaway kada tawen kadua ti homeowners’ associations (HOAs) iti lugarda.
Iti salinong ti House Bill 2852, gagem na daytoy a mapapigsa ti partisipasion ti nasurok 24, 200 a rehistrado nga homeowners association iti pagilian iti panangbukel ken panangipatungpal dagiti programa ti gobierno.
Segun ken ni Yamsuan, napateg ti akem ti HOAs gapu ta direkta nga ammo da ti husto a kasasaad ken kangrunaan a kasapulan ti komunidad da.
Isingasing ti gakat ti panang-amyendar ti Republic Act No. 9904 tapno aramiden nga obligasion ti LGUs nga agisayangkat ti bi-annual public consultations tapno makaala ti feedback, suggestion ken dagiti isyu a masapul a marisut, pakairamanan dagiti proyekto ken serbisio lokal.
