Maisayangkat ti wreath-laying ceremony ken gun salute iti Tirad Pass shrine idiay Gregorio Del Pilar inton December 2 kas pananglagip iti anibersaryo ti Battle of Tirad Pass.
Iti pannaki-uman ti Bombo Radyo Vigan ken ni Rexnen Dausen, Municipal Administrator ti Gregorio Del Pilar Local Government Unit, ti commemoration ket gundaway a bigbigen ti kinabanuar ni Gregorio del Pilar.
Napili ti Tirad Pass shrine a venue ti event ta isu ti nakapasamakan ti rinnupak idi kallabes.
Idaulwanto ti National Historical Commission of the Philippines ti seremonya kadua ti representative nga impatulod ni Presidente Ferdinand Marcos Jr.
Kalpasan ti programa ket addanto met maisayangkat a Farmer’s Day, Children’s Day, Cultural and Sports Day kas paset iti panagpiesta ti Gregorio del Pilar.
Adda pay nadumaduma a pasalip kadagiti pagadalan kas ti Zumba ken marching band contest a silulukat para kadagiti amin nga agindeg iti nasao nga ili.
