VIGAN CITY – Insingasing ti ACT Teachers Partylist a mabaliwan ti workload wenno iskedyul dagiti mangisursuro ita a naipatungpal ti distance learning babaen iti module ta mangparigat laeng iti kasasaadda agsipud ta kasapulanda iti naan-anay met laeng nga inana.
Iti pannaki-uman ti Bombo Radyo Vigan ken ni Rep. France Castro, kayatna nga ipaima kadagiti pagadalan no kasano ti schedule dagiti mangisursuro ken kasapulan a masurot latta dagiti protocols kontra iti Covid19.
Kabayatanna, saan a parikut kadakuada ti awan a periodical test ta pudno nga agkurkurang dagiti wagas iti panagisuro ta maysa pay kadagiti pagdandanaganda ti module sharing.
Ingunamgunam ti kongresista a rumbeng a kitaen ti DepEd ti nasao nga addang ta posible a makapadakes iti tunggal estudiante ken mangisursuro ti panagtipidda iti panagimprenta kadagiti modules a pagsisinnublatan dagiti agadal.
