Maibilang nga ‘unusual’ wenno saan a gagangay ti mapaspasaran a wildfire idiay South Korea kas pinasingkedan ti maysa a mangmangged iti nasao a pagilian.
Iti pannaki-uman ti Bombo Radyo Vigan ken ni Bombo International Correspondent Juneil Acula, napadpadasanda met ti wildfire kadagiti naglabas a tawen ngem adda laeng dua wenno maysa a matmatay, saan a kas ita nga immabot iti duapulo ket uppat.
Maysa kadagiti natay ti totally burned wenno nauram ti bagina, adda met dagiti natay iti suffocation ken maysa ti piloto gapu iti panagswek ti helicopter a naaramat a pangdepdep iti uram.
Maikalima itan nga aldaw a mapaspasaran ti nasao a pagilian ti wildfire isu a narigat met latta kadagiti bumbero ti mangdepdep iti apoy ta naangin ken buyogan pay iti dry weather nga isu ti mangitunda iti apuy nga agramaram kadagiti pagtaengan.
Nupay kasta, impasiguradona met nga awan ti Pilipino a karaman kadagiti natay ken kiddaw ita dagiti adda iti nasao a pagilian ti panagtudona tapno makatulong a mangdepdep iti apuy.
