VIGAN CITY – Naiyuswat ti panagsanay ti Water Safety and Survival for Riverside and Coastal Resident-Volunteers manipod November 8 agingga 11 iti agdama a tawen iti Brgy VII, Vigan City, Ilocos Sur.
Iti pannaki-uman ti Bombo Radyo kenni Jordan Soria, OIC iti Operations and Warning ti siudad ti Vigan, targetda a mangbukel ti force multiplier kadagiti nadumaduma a barangay kangrunaan dagiti adda ti igid ti karayan ken kabaybayan a katulunganda a mangisalakan no adda ti dumteng a didigra.
Segun ken ni Soria, targetda dagiti agtawen ti sangapulo ket walo agpangato iti intero a Vigan ta isuda ti naub-ubing, naalibtak ken namnamaenda a makatulong kadakuada nu adda ti pasamak.
Kabayatanna, sangapulo ket lima ti nakipagpaset ti aktibidad ket namnamaenda nga ad-adunto pay iti makipaset inton sumarsaruno ken pagyamananda amin a nagboluntaryo a makasursuro tapno manayunan ken maamwanda dagiti kasapulan nga aramiden nu adda iti emergency.
