Naisayangkat ti Nationwide Call for Peace Rally against Corruption iti ili ti Narvacan, Ilocos Sur a naawagan iti “Mapayapang Pakikibaka Kontra Korupsyon” a ti gagemna ket ipamatmat ti panangkontrada iti korapsion a mapaspasamak iti probinsia.
Ti nasao a rally ket indaulwan ni Atty. Estelita ‘Tillie’ Cordero ken ti grupo a Warriors ti Narvacan a nakipasetan met dagiti nadumaduma nga ili.
Paset iti aktibidad ti pannakaisayangkat nga umuna ti misa a sinaruno ti peaceful walk.
Iti pannaki-uman ti Bombo Radyo Vigan ken ni Atty. Cordero, maysa kadagiti kangrunaan a gagemda ket ibutaktak dagiti madi nga inar-aramid dagiti Singson iti probinsia a nangparparigat kadagiti umili ken ti kunana a nagar-ari iti probinsia iti nasurok 50 a tawen.
Bigbigen pay ni Cordero ti binilion a pisos a maaw-awat ti Ilocos Sur manipud iti Republic Act 7171 ngem sabali ti pakaibambanaganna.
Maipalagip a pinilaan ti nasao nga abogado iti kaso a graft ken plunder ni dati a Narvacan Mayor Luis Chavit Singson iti Office of the Ombudsman idi October 20, 2025.
Ti kaso ket adda pakainaiganna iti daga a nakaipatakderan ti Santorini-style mansion iti ili ti Narvacan a mapapati a kukua ti gobierno ngem tinagikua ni Singson.
Iti agdama ket kidkiddawen met ti Office of the Ombudsman ti Counter-Affidavits dagiti respondent iti nasao a kaso.
