VIGAN CITY – Nakemmeg ti Top 7 Most Wanted Person City Level a ni Arnel Artienda, agtawen iti tallopulo ket walo, OFW a taga-Ayusan Norte, Vigan City babaen iti bileg ti warrant of arrest gapu iti kasona nga estafa.
Nairuar ti warrant of arrest ti suspek babaen iti RTC Branch 20, Vigan City a napetsaan iti October 29, 2013 ken nailatangan iti PHP60,000 a pyansa para ti temporaryo a pannakawaya-wayana.
Idiay Sitio Guimod, Barangay Rubio, Galimuyod met a nakemmeg ni Barangay Kagawad Marcos Del Rosario, agtawen iti limapulo ket lima ken ni Salvador Millian, agtawen iti innem a pulo ket lima, mannalon nga agpada nga agnaed iti nasao a lugar.
Kaso a panaglabsing iti Republic Act 10631 ti sangsangwen dagiti suspek a ti warrant of arrest-da ket imparuar ti 8th MCTC Salcedo-Galimuyod, napetsaan iti February 18, 2022 ken nailatangan iti PHP12,000 a pyansa iti tunggal maysa kadakuada para ti temporaryo a pannaka-wayawayada.
Nakemmeg pay ti Top 4 Municipal Level a ni Harry Sagnep, agtawen iti uppat a pulo a taga-Namruangan, Cabugao gapu iti kaso a panaglabsing iti RA 9262 wenno ti Anti-Violence against Woman and their Children Act of 2004.
Ti warrant of arrest-na ket imparuar ti Regional Trial Court, Second Judicial Region, Branch 7, Aparri, Cagayan a napetsaan iti February 9, 2022. PHP36,000 ti nailatang a pyansa para ti temporaryo a pannaka-wayawayana.
