VIGAN CITY – Balligi ti pannakakemmeg dagiti kameng ti Narvacan Municipal Police Station idiay District 4, Cuyapo, Nueva Ecija ken ni Rodel Rebaula, agtawen iti uppat a pulo, taga-Barangay Quinarayan, Narvacan babaen ti COPLAN “Uncle Kallong”.
Ti akusado ket sumangsango iti kaso a rape a ti warrant of arrest-na ket imparuar ti Narvacan Branch Ilocos Sur, napetsaan iti September 18, 2017 ken awan ti nailatang a pyansana.
Iti pannaki-uman ti Bombo Radyo Vigan ken ni Police Major Arcadio Viloria, awanen ti akusado iti ili ti Narvacan idi nairuar ti warrant of arrest-na idi 2017 ken namonitorda nga adda idiay Isabela idi 2020.
Idi ginandat met giti pannakabagi ti linteg ti mapan idiay Isabela ket mapapati nga adda nakaamoan ti akusado isu a napan manen idiay Manila ket saanen a natakuatan pay no ania a lugar ti ayanna.
Ngem babaen ti pannakikinnamayet dagiti pannakabagi ti linteg kadagiti pamilia ken karruba ti akusado ket nasapulanda met laeng ti lugar nga ayanna.
