VIGAN CITY – Walopulo a porsiento kadagiti residente iti ili ti Santa ti nababa iti gagarda a mabakunaan kontra Covid kas rimuar iti survey nga insayangkat ti Santa-Local Government Unit kadagiti duapulo ket innem a barangay.
Iti pannaki-uman ti Bombo Radyo Vigan ken ni Vice Mayor Jeremy Bueno, dayta ket gapu ti amak dagiti residente iti dakes nga epekto ti bakuna kas ti napasamak idi iti Dengvaxia vaccine ken dagiti madamdamagda iti social media.
Maysa kadagiti addang ti nasao nga ili ti mangisayangkat iti information campaign tapno maallukoy ken maipakaawat kadagiti agindeg no kasano ti kinapateg ti bakuna, no siasino dagiti mabalin a mabakunaan ken no ania dagiti posible a mariknada no mabakunaanda.
Patien ni Vice Mayor Bueno a no nabakunaan dagiti umili ket mapalukayan dagiti restriksyon ti pagilian ken maisubli iti normal ti garaw dagiti umili ken in-inut a mailung-aw ti ekonomia.
Nupay kasta, balakad ti bise mayor a talken ti siyensya ta dagiti bakuna ket inadal a naimbag dagiti eksperto ket no adda man buteng ti tunggal maysa gapu ta adda saksakitenda, masapulda laeng a mangala iti clearance manipud iti doktor.
