VIGAN CITY – Walo iti nakemmeg gapu ti panagsusugalda idiay Barangay Sawat, Tagudin, Ilocos Sur.
Segun ken ni PCMS. Lorenzo Cariaga iti Tagudin Municipal Police Station, naaktuanda iti panagay-ayam ti Pusoy Biyaya dagiti suspek iti linged iti kayo iti kalamansi iti nasao a lugar.
Dagiti suspek ket nabigbig a da Teresita Leal Lucero, agtawen ti innem a pulo ket walo; Mayra Lorena Lopez, agtawen ti tallopulo; Angelina Acosta Lopez, agtawen ti tallopulo ket tallo; Aida Navarro, agtawen ti uppat a pulo ket dua; Heidie Lorenzana Barnachea, agtawen ti uppat a pulo ket tallo; Gloria Lopez Agsaulio, agtawen ti limapulo ket siam; Arnulfu Macayan Agsaulio, agtawen ti walopulo ket walo; ken Sharon Nang Del Castillo, agtawen ti uppat a pulo nga agpapada nga agnaed idiay Brgy. Sawat, Tagudin.
Segun ken ni Cariaga, datin nga adda iti maidandanon kadakuada a report inaig iti panagsusugal ti lugar ngem umuna a gundaway a naaktuanda iti panagaay-ayam dagiti suspek.
Naala kadakuada iti dua a set ti baraha ken pusta nga aggatad iti sangaribo pitopulo ket innem a pisos.
Addan ti kustodiya ti pannakabagi ti linteg dagiti nakemmeg a suspek ken dagiti naala kadakuada nga ebidensya tapno dumalan ti husto a proseso.
