VIGAN CITY – Nakemmeg ti walo a suspek a miembro ti salisi gang idiay Brgy. Poblacion Norte, Santiago, Ilocos Sur.
Nabigbig dagiti suspek a da Paulino Gallardo, Alfredo Gallardo, Jonathan Cortez, Benny Capistrano, Gabriel Reguyal, Al Dexter So, Jan Earth Sorian Madayag ken Albert Gangabete nga agpapada nga agnaed ti probinsya ti Pangasinan.
Iti pannaki-uman iti Bombo Radyo Vigan ken ni PLt. Godofredo Ribuyaco iti Santiago Municipal Police Station, simrek iti Lola Beatriz Gen. Merchandise dagiti suspek ket tallo kadakuada ti napan ti cashier, saleslady ken bagger idinto a dagiti uppat a suspek ket naglikaw-likaw iti uneg met laeng iti pagtagilakoan.
Rimmuar dagiti pito a suspek ket innalada ti dua a pakete iti hotdog a saanda a binayadan ngem nakita ti kahera a ni Andrea Singson.
Kinamatda dagiti suspek agingga a nakadanunda ti Hi-Pad ti PNP nga isu a nagpatulunganda tapno makemmeg dagiti suspek.
Naala kadakuada ti nasurok kumurang sangapulo a ribo a pisos a naglakoan ti tienda.
