VIGAN CITY- Nasurok kumurang a Php60,000 pesos ti gatad dagiti walo a kalding a natakaw a taraken ni Florencio Manzano, agtawen iti walopulo ket siam, taga-Barangay Bagar, Candon City.
Iti pannaki-uman ti Bombo Radyo Vigan ken ni Manzano, idi Lunes iti oras ti alas-kuatro ti malem ket inyapun dagiti tarakenna ti maysa a compound idiay Barangay San Agustin, Candon City, lima a metro a kaadayo manipud pagtaenganda.
Ngem idi mapanna kitaen dagiti tarakenna a kalding iti alas kuatro ti parbangon idi kalman ket nasdaaaw ta nakalukat dagiti nakapupokanda, ken dua laengen ti nabati.
Karaman kadagiti natakaw a kaldingna ket dagiti dua a masikug ken dadakkel payen dagiti dadduma a tarakenna isu a planona a partien iti maysa kadakuada inton madanun ti panagkasangayna.
Gapu ti napasamak, napan nagpatulong ti biktima kadagiti otoridad, ket iti panangpaspasyar dagiti polis adda nakitada a tali iti paset ti Candon National High School nga asideg iti nakaiyapunan dagiti tarakenna.
Segun ti biktima, adda nakita dagiti agnaed iti asideg ti nakaiyapunan dagiti tarakenna nga adda nakamotor a nagsipsipot iti pagiyap-apunanna kadagiti kalding a patienna a nangtakaw kadagiti kaldingna.
