Saan a mabalin nga ipresenta dagiti abogadona iti impeachment proceedings iti House Committee on Justice ni Vice President Sara Duterte.
Dayta ti pinasingkedan ni Batangas Rep. Gerville Luistro, chairperson ti komite gapu ta mapapati nga awan iti House Rules a mapalubosan dagiti abogado ti maipa-impeach nga opisial ti gobierno a mabalin a sumali dagitoy iti impeachment proceedings.
Maaddan laeng iti akem dagiti abogado ti maipapa-impeach nga opisial iti deliberasion no addanto aktwal a trial iti kaso iti Senado nga isu ti tumakder kas impeachment court.
Gapu dayta, kasapulan ti personal a presensya ni Duterte iti deliberasion iti impeachment case kontra kenkuana iti komite isu a mapaayaban ngem karbenganna ti saan a sumango.
Inton Marso 2, marugian ti pannakaadal iti sufficiency in form ti 4 nga impeachment complaint kontra ken ni Duterte sakbay a maammuan no adda makanay a pagibasaran dagiti reklamo kontra kenkuana.
Maibasar iti proseso, agsina a pagbotosan dagiti miembro ti komite no sufficient in form ken sufficient in substance ti reklamo.
