Pinaglibakan ni Bise Presidente Sara Duterte nga am-ammona ni dati a police corporal Rodulfo Gracioso Jr. wenno nakaawat iti kuarta manipud kenkuana, kalpasan ti alegasion a nasurok a P2-B a kuarta ti impatulodna iti bise presidente.
Imbatad ni Gracioso iti sapatana a nasurok duapulo a daras nga impatulodna dagiti maleta a naglaon iti P20-M agingga iti P50-M ken ni Duterte sadiay Metro Manila, Davao ken dadduma pay a lugar.
Pinaglibakan met ti abogado ni dati a House Speaker Lord Allan Velasco ti alegasion ni Gracioso ken inawagan daytoy a parparbo, idinto a kinuna ti National Bureau of Investigation (NBI) a nagpa-polygraph examination ti dati a pulis ken agtultuloy ti panangberipika kadagiti statement-na.
Kabayatanna, impatalged ti House prosecution a mabalin a sinalungasing ni Duterte ti Konstitusion gapu ta nagtalinaed a direktor ken stockholder ti Metro City Chow Foods Corp., ken manamnama a mangidatag iti pito a witness a pakairamanan da dati a senador Antonio Trillanes IV ken Davao City Mayor Sebastian Duterte iti sumaruno a hearing.
