Pinasingkedan ni dati nga undersecretary ti Department of Education (DepEd) nga isu ken dagiti dadduma nga empleado ket nakaawatda iti binulan a sobre a naglaon iti P50,000 a kuarta iti las-ud ti siam a bulan iti panagtakem ni Bise Presidente Sara Duterte kas DepEd secretary.
Imbutaktak ni dati a DepEd Undersecretary Gloria Jumamil Mercado iti maikadua a panagimbestigar ti House good governance committee mainaig iti maipagarup a saan nga usto a panagusar ti DepEd iti public funds.
Iti sinapataanna a statement, kinuna ni Mercado a ti head executive assistant ni Vice President a ni Sunshine Fajarda ket nangited kenkuana iti maysa a sobre para iti tunggal bulan manipud Pebrero agingga iti Setiembre 2023 nga adda labeled na a “HOPE,” a kayatna a sawen ket Head of Procuring Entity.
Nagserbi ni Mercado kas procurement head ken human resources head ti DepEd idi 2023.
Imbagana kadagiti agpapanday-linteg a saanna pulos a linuktan dagiti sobre, ken inbati na laeng iti uneg ti maysa a pouch ti opisinana.
Idi laeng pimmanaw iti ahensia para iti “voluntary retirement” idi Oktubre 2023 a natakuatanna dagiti siam a sobre a naglaon iti P50,000 ti tunggal maysa nga adda pakabuklan a P450,000, nga indonarna iti maysa a non-government organization babaen ti balakad ti dadduma.
