Impila ni Vice President Sara Duterte ti kaso a perjury kontra iti mapapati a bagman-na a ni Ramil Madriaga ita nga aldaw idiay Taguig City Prosecutor’s Office.
Maipalagip nga inakusaran ni Madriaga a pinondoan dagiti drug dealer ken Philippine Offshore Gaming Operators (POGO) ti kampania ni Duterte.
Pinaglibakan met dayta ni Duterte ken impaganetgetna nga awan ti personal a relasyonna ken ni Madriaga.
Segun ken ni Duterte, impilana ti kaso a perjury kontra ken ni Madriaga tapno madusa iti kinaulbodna ta saan a mabalin nga agar-aramid laeng iti istorya tapno maallilaw iti publiko.
Kinunana pay ti bise presidente a ni Madriaga ket maysa nga akusado iti kaso a kidnapping nga agpampammarang a campaign supporter sakbay pay a rimmuar a testigo iti impeachment complaint kontra kenkuana.
Dagiti pammabasol ni Madriaga ket pakairamanan dagiti naipasa iti impeachment complaint a naipila kontra ken ni Duterte.
