Kinondenar ni Vice President Sara Duterte ti Marcos administration kalpasan ti pammaltog iti Banga National High School idiay South Cotabato a nakatayan dagiti tallo nga estudyante ken nakadunoran ti walo.
Segun ken ni Duterte, daytoyen ti maikatlo nga school shooting ita a tawen ken impaganetgetna a nasken nga adda ti nasaysayaat a tignay ken naur-urnos a patangan iti kinatalged dagiti agad-adal.
Kabayatanna, imbilin ni Presidente Ferdinand Marcos Jr. ti naun-uneg nga imbestigasyon iti insidente, agraman no kasano a nakaala ken nakaitugot iti paltog iti pagadalan ti maysa a menor de edad.
Segun ken ni Marcos, nasken a mapabileg dagiti addang tapno masigurado ti kinatalged dagiti estudyante, kagiddan ti panagtultuloy ti imbestigasyon dagiti pannakabagi ti linteg.
