Kinarit ni Vice President Sara Duterte ni Defense Secretary Gilberto “Gibo” Teodoro nga inaganan dagiti opisial ti gobierno a mapapati a pro-China wenno mangisalsalakan iti Beijing maipanggep iti isyu ti West Philippine Sea (WPS).
Nagsarita ni Duterte idiay Davao City kalpasan a nagsarita ni Teodoro a rumbeng nga agikkat laengen iti serbisio dagiti opisial ti gobierno a saan a mangsupsuportar iti polisiya iti Pilipinas ken uman-anamong iti China.
Impaganetget ti bise presidente a saan a mabalin nga agibbat iti seryoso a sarita wenno akusasyon ni Teodoro nga awan iti dakamatenna a nagan wenno listaan dagiti opisial.
Segun ken ni VP Sara, ti panagakusar nga awan iti pagbasaran ket agresulta laeng iti madi nga atap ken espekulasyon kontra iti dadduma pay nga opisyal nga awan iti pakainaiganna.
Innayon ti bise presidente a gapu ta awan ti sinarita ni Teodoro ket posible a mairaman uray ni Pres. Ferdinand Marcos kadagiti pagduduaan iti publiko.
