Inwaragawag ni VP Sara Duterte a naka depende no tumabuno isuna iti impeachment trial kalpasan a kinunana iti House Prosecution nga adda posibilidad a maisalang daytoy kas witness.
Segun ken ni Duterte, awan pay ti naawatna nga imbitasion manipud iti Senate Impeachment Court.
Impaganetget ti Bise Presidente a ti impeachment ket maysa a legal a proseso ken ti panagsango dagiti abogadona iti senado ket maibilang kas appearance ken partisipasionna iti proseso ti impeachment.
Kabayatanna, isagsagana ti kampo ni VP Sara ti depensada no kas pangarigan isangoda kas hostile witness ni Davao City Mayor Sebastian “Baste” Duterte iti impeachment trial ti kabsatna.
Segun kenni defense lawyer Justin Gular, naawatdan ti kopya ti subpoena para ken ni Baste, ngem saanda pay nga iruar ti masanguanan a panagsaganada agingga a saanda makita ti agbalin a testimonia ken dokumento a mabalinda nga idatag.
Idi Martes, dua a personnel ti Senate Office of the Sergeant-at-Arms ti personal a napan idiay Siudad ti Davao tapno ited ti subpoena.
Masapul nga agparang ni Baste iti Senate impeachment court manipud September 28 agingga 30, iti alas diyes ti bigat, kas saksi para iti house prosecution.
Naibaga iti subpoena a masapul nga itedna ti testimoniana mainaig iti ammona iti kaso ti impeachment kontra ken ni VP Sara Duterte.
