Binanatan ni Vice President Sara Duterte ti naipila nga impeachment complaint kontra kenkuana nga inyendorso ti Akbayan.
Segun ken ni Duterte, ti impeachment nga inyendorso ti Akbayan ket maysa a papel nga awan ti nayonna nga ania man nga ebidensia a mangpaneknek kadagiti pammabasul.
Innayon ni VP Sara a saanen a damo daytoy ta ti impeachment kontra kenkuana ti nagbalin a sungbat iti ipapanawna iti gabinete – maysa nga addang a naaramid gapu ta saanen a maipalawag ti presidente ti pannakailumlom ti pagilian iti rigat gapu iti kinamanag-baybay-a ken bisyona.
Kunana pay a planado ti panangipila iti impeachment kontra kenkuana agraman ti “investigation in aid of legislation” idi 19TH Congress a mapapati a naisayangkat saan a tapno makaaramid iti linteg no di ket rason ti pannakapatakyasna.
Inyunay-unay ti bise presidente nga awan ti kredibilidad ti Akbayan a mangiyendorso wenno mangipasa iti maysa nga impeachment complaint.
