Imbutaktak ni Vice President Sara Duterte a naaramat ti confidential funds a nailatang iti Department of Education tapno maimbestigaran ti mapapati nga anomalya iti ahensia nga idadaulwanna idi, agraman ti P2.9 billion deal para kadagiti daan ken sobra a presio dagiti laptop.
Ngem daytoy ket agduma iti kinuna ti DepEd idi napan a tawen a saanda nga ammo no kasano a ginastos ni Duterte ti P112.5 milion a confidential funds para iti ahensia idi 2023.
Nagkedked idin ni Duterte nga ibaga no kasano nga aramaten dagiti confidential funds, ta intudona ti Commission on Audit kas otorisado nga ahensia a mangibutaktak no napanan dagiti pondo.
Idi Marso 2022, imbandera ti COA ti DepEd, nga idi ket adda iti salinong ni Secretary Leonor Briones, para iti panaggatang iti P2.4 bilion a gatad ti daan ken nangina a laptop para kadagiti mangisursuro a nangisayangkat iti online class idi 2021, panawen idi ti Covid19.
