Patien ni Vice President Sara Duterte a ti Marcos administration ket saan nga “stable” iti baet dagiti alegasyon ti korapsyon nga adda dagiti sumagmamano nga agpampanday-linteg a karaman.
Imbutaktak daytoy ni VP Sara idiay Senado kalpasan a naaprubaran ti finance subcommittee ti gakat a P902.895 million budget ti Office of the Vice President (OVP) para iti fiscal year 2026.
Sinungbatan daytoy ni Presidential Communications Office Undersecretary at Palace Press Officer Claire Castro ket imbilangna a kinaulbod iti imbaga ti bise presidente.
Kinuna ni Castro a bulsek ti bise presidente a nangibaga nga “unstable” ti Marcos administration ita a kontrobersyal iti korapsion.
Pinasingkedan pay ni Castro a ni Presidente Ferdinand Marcos Jr. ti nangirugi iti imbestigasyon kadagiti maanomalya a flood control projects saan a kapada iti napalabas nga administrasyon.
