Bimmisita ni Vice President Sara Duterte iti amana a ni dati a Pres. Rodrigo Duterte iti International Criminal Court Detention Center idiay The Hague, Netherlands.
Segun ken ni VP Sara, nagpatanganda iti salun-at ti dati a presidente, pamilia ken politika ngem saanda a nagsaritaan iti pannakaibasura ti ICC iti interim release-na.
Maipalagip nga idi Biernes ket pinagkedkedan ti Appeals Chamber iti ICC ti apela ti dati a presidente Duterte para iti conditional release nga immunan nga imbasura ti Pre-Trial Chamber idi Setyembre.
Indanon ni VP Sara iti panagyaman ti dati a presidente kadagiti Pilipino a mangsupsuportar ken nagkakadua iti ruar iti ICC iti baet ti nalamiis a panniempo.
Kabayatanna, itultuloy ti ICC Office of the Prosecutor iti panagsagana para iti confirmation of charges hearing kontra ken ni Duterte, a naisanud nga awan ti petsa kalpasan nga impaganetget ti kampona a saan a fit to stand trial.
