Binabalaw ni Vice President Sara Z. Duterte ti Malacañang gapu iti panangisayangkat ti ‘party’, a dinar-ayan ni First Lady Liza Araneta-Marcos, iti abet ti epekto ti Bagyo Tino.
Immunan a dinepensaan ni Presidential Communications Office Undersecretary Claire Castro ti first lady a ti naisayangkat nga aktibidad ket maysa nga opisial a banag ken saan laeng a panagkawe kadagiti costume kas ti Snow White party.
Impaganetget met ti bise presidente a ti panangdillaw kenkuana ket saan a mangrisut iti kinaragsak bayat nga adu ti umili ti agrigrigat gapu iti nakaro nga epekto ni Bagyo Tino, ken saan a nasken a sabalian wenno iyadayo ti Palasio ti atension kadagiti dadduma nga isyu tapno maabbongan dagiti biddut ti gobierno.
Maipalagip a dimmar-ay ni Liza iti book launch ti “Philippine First Ladies’ Portraits” ken ti Goldenberg Concert Series musical event a naisayangkat idiay Malacañang idi Nobyembre 6 ken 7. Augie Arellano
